കണ്ണൂരിൽ നിയന്ത്രണം വിട്ട വാഹനമിടിച്ചു കോഫി ഹൗസ് ജീവനക്കാരന് ദാരുണാന്ത്യം

കണ്ണൂർ: കണ്ണൂർ നഗരത്തിൽ നിന്നും ജോലി കഴിഞ്ഞുമടങ്ങുകയായിരുന്ന കോഫി ഹൗസ് ജീവനക്കാരനായ യുവാവ് വാഹനമിടിച്ചു മരിച്ചു. ചെങ്ങളായിപെരിങ്കോന്നിലെ ഐ എം ശ്രീരാജാണ് (42) ദാരുണമായി മരിച്ചത്. ഞായറാഴ്ച്ച രാത്രി 11.30 ന് ജോലി കഴിഞ്ഞ് താമസിക്കുന്ന മുറിയിലേക്ക് കാൽനടയായി പോവുമ്പോൾ പഴയ ബസ് സ്റ്റാൻഡിൽ നിന്നും കാൽടെക്സിലേക്ക് വരികയായിരുന്ന നിയന്ത്രണം വിട്ടെത്തിയ ഫോർ രജിസ്‌ട്രേഷൻ വാഹനം ഇടിച്ചു തെറിപ്പിക്കുകയായിരുന്നു. ഉടൻ നാട്ടുകാരും പൊലിസും ചേർന്ന് കണ്ണൂർ എ കെ ജി സഹകരണ ആശുപത്രിയിലെത്തിച്ചുവെങ്കിലും ജീവൻ രക്ഷിക്കാനായില്ല. കണ്ണൂർ കാൽ ടെക്സിലെ കോഫി ഹൗസ് ജീവനക്കാരനാണ് ശ്രീരാജ്. പരേതനായ ജനാർദ്ദനൻ – ശകുന്തള ദമ്പതികളുടെ മകനാണ്. സഹോദരങ്ങൾ: കവിത ( തളിപ്പറമ്പ് സഹകരണ ആശുപത്രി), ശ്രീകുമാർ (ഇരിട്ടി), പരേതരായ പ്രമീള, സന്തോഷ്. പൊതുദർശനം പെരിങ്കോന്ന് യുവജന ഗ്രന്ഥാലയത്തിൽ ഉച്ചയ്ക്ക് രണ്ടു മണി മുതൽ 3.30 വരെ തുടർന്ന് വീട്ടിൽ പൊതുദർശനം. സംസ്കാരം വൈകിട്ട് പെരുങ്കോന്ന് പഞ്ചായത്ത് ശ്മശാനത്തിൽ നടക്കും.