പ്രതിഷേധത്തിനൊടുവിൽ അധ്യാപകർക്ക് ആശ്വാസം; കെ ടെറ്റ് ഇല്ലാത്തവരെ പിരിച്ചുവിടാനുള്ള ഉത്തരവ് പിൻവലിച്ച് സർക്കാർ

കെ- ടെറ്റ് ഇല്ലാത്തവരെ പിരിച്ചു വിടാനുള്ള ഉത്തരവ് പിൻവലിച്ച് സർക്കാർ. പൊതു വിദ്യാഭ്യാസ വകുപ്പ് പുതിയ ഉത്തരവിറക്കി. കെഎസ്ടിഎ അടക്കമുള്ള അധ്യാപക സംഘടനയുടെ സമ്മർദ്ദത്താലാണ് നടപടി. വിഷയത്തിൽ പുതിയ സർക്കുലർ പിന്നീടെന്നാണ് ഉത്തരവിൽ പറയുന്നത്. കെ- ടെറ്റ് യോഗ്യതയില്ലാതെ പ്രമോഷൻ നേടിയവരെ മാതൃ തസ്തികയിലേക്ക് തിരിച്ചയക്കണമെന്ന് പൊതു വിദ്യാഭ്യാസ കഴിഞ്ഞ ദിവസം ഇറക്കിയ ഉത്തരവിൽ പറഞ്ഞിരുന്നത്. കെ- ടെറ്റ് ഇല്ലാത്തവരെ പിരിച്ചു വിടണം എന്നായിരുന്നു ഉത്തരവ്. സ്ഥാനക്കയറ്റം ലഭിച്ച അധ്യാപകരെ തരംതാഴ്ത്താനുള്ള സർക്കാർ ഉത്തരവ് റദ്ദാക്കണമെന്ന് കെ.എസ്.ടി.എ സംസ്ഥാന കമ്മിറ്റി കഴിഞ്ഞ ദിവസം സർക്കാരിനോട് ആവശ്യപ്പെട്ടിരുന്നു. 2025 സെപ്റ്റംബർ 01 ലെ കോടതി വിധിയ്ക്കു ശേഷവും കെ.ടെറ്റ് യോഗ്യത നേടാത്തവർക്ക് ബോണ്ട് നൽകി പ്രമോഷൻ നൽകാൻ കഴിഞ്ഞ എൽ.ഡി.എഫ് സർക്കാർ ഉത്തരവ് ഇറക്കിയിരുന്നു. ഇതിന്റെ അടിസ്ഥാനത്തിൽ സ്ഥാനക്കയറ്റം ലഭിച്ച ആയിരക്കണക്കിന് അധ്യാപകരെയാണ് എൽ.പി, യു.പി, ഹൈസ്കൂൾ, ഹയർസെക്കൻററി മേഖലകളിൽ നിന്ന് ഈ ഉത്തരവിലൂടെ തരം താഴ്ത്തുന്നതെന്നും കെ.എസ്.ടി.എ അറിയിച്ചിരുന്നു.