മുട്ട പുഴുങ്ങിയാണോ കഴിക്കേണ്ടത്, ഓംലെറ്റാണോ നല്ലത്? പാകം ചെയ്യുന്ന രീതി മാറുമ്പോൾ പ്രോട്ടീന്റെ അളവും മാറുമോ?
പ്രഭാതഭക്ഷണത്തില്‍ മുട്ട ഉള്‍പ്പെടുത്തുന്നവര്‍ നിരവധിയാണ്. ജിമ്മില്‍ പോകുന്നവര്‍ക്കും ശരീരഭാരം നിയന്ത്രിക്കാന്‍ ശ്രമിക്കുന്നവര്‍ക്കും മുട്ട പ്രധാനപ്പെട്ട ഭക്ഷണവുമാണ്. എന്നാല്‍ മുട്ട പുഴുങ്ങി കഴിക്കുന്നതാണോ കൂടുതല്‍ നല്ലത്, അതോ ഓംലെറ്റായോ ബുള്‍സൈ ആയോ കഴിക്കുന്നതാണോ കൂടുതല്‍ പ്രോട്ടീന്‍ നല്‍കുക?.. ഈ സംശയം പലര്‍ക്കുമുണ്ട്. മുട്ട പാകം ചെയ്യുന്ന രീതി അതിന്റെ പ്രോട്ടീന്‍ അളവിനെ കാര്യമായി മാറ്റുന്നില്ലെന്നാണ് പോഷകാഹാര വിദഗ്ധര്‍ ചൂണ്ടിക്കാട്ടുന്നത്. എന്നാല്‍ പാചകത്തിനായി ഉപയോഗിക്കുന്ന എണ്ണ, ബട്ടര്‍, പാല്‍ തുടങ്ങിയ ചേരുവകള്‍ ഭക്ഷണത്തിന്റെ മൊത്തം പോഷകമൂല്യത്തിലും കലോറിയിലും മാറ്റമുണ്ടാക്കാം.
ഒരു മുട്ടയില്‍ എത്ര പ്രോട്ടീനുണ്ട്?
ഒരു വലിയ മുട്ടയില്‍ നിന്ന് ഏകദേശം 6 മുതല്‍ 6.5 ഗ്രാം വരെ പ്രോട്ടീന്‍ ലഭിക്കും. മുട്ടയുടെ വെള്ളയിലും മഞ്ഞക്കരുവിലും പ്രോട്ടീനുണ്ട്. ശരീരത്തിന് ആവശ്യമായ ഒന്‍പത് അവശ്യ അമിനോ ആസിഡുകളും മുട്ടയില്‍ അടങ്ങിയിരിക്കുന്നതിനാല്‍ മികച്ച ഗുണമേന്മയുള്ള പ്രോട്ടീന്റെ ഉറവിടമായാണ് ഇതിനെ കണക്കാക്കുന്നത്. മസിലുകളുടെ വളര്‍ച്ചയ്ക്കും പരിപാലനത്തിനും ശരീരത്തിലെ കോശങ്ങളുടെ അറ്റകുറ്റപ്പണികള്‍ക്കും പ്രോട്ടീന്‍ ആവശ്യമാണ്. അതുകൊണ്ടുതന്നെ വ്യായാമം ചെയ്യുന്നവര്‍ക്ക് മുട്ട നല്ലൊരു ഭക്ഷണമാണ്.
പുഴുങ്ങിയ മുട്ട കഴിച്ചാല്‍ പ്രോട്ടീന്‍ കൂടുമോ?
മുട്ട പുഴുങ്ങുമ്പോള്‍ അതിലെ പ്രോട്ടീന്റെ അളവ് മറ്റുരീതികളില്‍ പാകം ചെയ്ത മുട്ടയേക്കാള്‍ കാര്യമായി കൂടുന്നില്ല. എന്നാല്‍ പുഴുങ്ങിയ മുട്ട എണ്ണയോ ബട്ടറോ ചേര്‍ക്കാതെ തയ്യാറാക്കാന്‍ കഴിയുന്നതിനാല്‍ കലോറി നിയന്ത്രിക്കാന്‍ ശ്രമിക്കുന്നവര്‍ക്ക് നല്ലൊരു തിരഞ്ഞെടുപ്പാണ്. മുട്ട പാകം ചെയ്യുമ്പോള്‍ ചൂട് പ്രോട്ടീന്റെ ഘടനയില്‍ മാറ്റമുണ്ടാക്കുന്നു. ഇത് ദഹനത്തിന് സഹായകമാണ്. അതിനാല്‍ പച്ചമുട്ട കഴിക്കുന്നതിനേക്കാള്‍ പാകം ചെയ്ത മുട്ടയിലെ പ്രോട്ടീന്‍ ശരീരത്തിന് എളുപ്പത്തില്‍ വിഘടിപ്പിച്ച് ഉപയോഗിക്കാനാകും.
ഓംലെറ്റിലും ബുള്‍സൈയിലും പ്രോട്ടീന്‍ കുറയുമോ?
മുട്ടയുടെ പ്രോട്ടീന്‍ ലഭ്യതയുടെ കാര്യത്തില്‍ ഓംലെറ്റിനും ബുള്‍സൈയ്ക്കും പുഴുങ്ങിയ മുട്ടയേക്കാള്‍ വലിയ വ്യത്യാസമില്ല. മുട്ട പാകം ചെയ്യുന്ന സമയത്ത് സാധാരണ ഉണ്ടാകുന്ന മാറ്റങ്ങള്‍ അതിലെ പ്രോട്ടീന്റെ ഗുണമേന്മയെ കാര്യമായി കുറയ്ക്കുന്നില്ല. എന്നാല്‍ ഓംലെറ്റ് തയ്യാറാക്കുമ്പോള്‍ കൂടുതല്‍ എണ്ണ, ബട്ടര്‍, ചീസ് തുടങ്ങിയവ ചേര്‍ത്താല്‍ ഭക്ഷണത്തിലെ കൊഴുപ്പിന്റെയും കലോറിയുടെയും അളവ് കൂടും. പാല്‍ ചേര്‍ത്താല്‍ കുറച്ച് അധിക പ്രോട്ടീനും ലഭിക്കാം.
ഹാഫ് ബോയില്‍ കഴിച്ചാലോ?
മുട്ടയുടെ വെള്ളയും മഞ്ഞക്കരുവും പൂര്‍ണമായി വേവിക്കാതെ കഴിക്കുന്ന രീതിയാണ് ഹാഫ് ബോയില്‍. എന്നാല്‍ പൂര്‍ണമായി വേവിച്ച മുട്ടയെക്കാള്‍ ഹാഫ് ബോയില്‍ കഴിച്ചാല്‍ കൂടുതല്‍ പ്രോട്ടീന്‍ ലഭിക്കുമെന്ന് പറയാനാവില്ല. എന്നാല്‍ മുട്ട പൂര്‍ണമായി പാകം ചെയ്യുന്നത് സാല്‍മൊണല്ല പോലുള്ള രോഗാണുക്കള്‍ മൂലമുള്ള ഭക്ഷ്യവിഷബാധയുടെ സാധ്യത കുറയ്ക്കാന്‍ സഹായിക്കും. അതിനാല്‍ പ്രത്യേകിച്ച് കുട്ടികള്‍, ഗര്‍ഭിണികള്‍, പ്രായമായവര്‍, പ്രതിരോധശേഷി കുറഞ്ഞവര്‍ എന്നിവര്‍ നന്നായി പാകം ചെയ്ത മുട്ട തിരഞ്ഞെടുക്കുന്നതാണ് സുരക്ഷിതം.
മുട്ട അമിതമായി വേവിക്കുന്നത് നല്ലതാണോ?
സാധാരണ പാചകരീതികളില്‍ മുട്ട വേവിക്കുന്നതുകൊണ്ട് അതിലെ പ്രോട്ടീന്‍ കാര്യമായി നഷ്ടപ്പെടുന്നില്ല. എന്നാല്‍ വളരെ ഉയര്‍ന്ന ചൂടില്‍ ദീര്‍ഘനേരം പാകം ചെയ്യുകയോ മുട്ട കരിഞ്ഞുപോകുന്നതുവരെ വറുക്കുകയോ ചെയ്യുന്നത് ചില പോഷകഘടകങ്ങളുടെ ഗുണമേന്മയെ ബാധിക്കാം. അതിനാല്‍ മുട്ട അമിതമായി വേവിക്കാതെ ആവശ്യത്തിന് പാകം ചെയ്യുന്നതാണ് നല്ലത്.
ശരീരഭാരം കുറയ്ക്കാന്‍ ശ്രമിക്കുന്നവര്‍ ഏത് രീതി തിരഞ്ഞെടുക്കണം?
ശരീരഭാരം കുറയ്ക്കാന്‍ ശ്രമിക്കുന്നവര്‍ക്ക് എണ്ണ ചേര്‍ക്കാത്ത പുഴുങ്ങിയ മുട്ടയോ കുറച്ച് എണ്ണയില്‍ തയ്യാറാക്കിയ ഓംലെറ്റോ തിരഞ്ഞെടുക്കാവുന്നതാണ്. മുട്ടയിലെ പ്രോട്ടീന്‍ വയറുനിറഞ്ഞ തോന്നല്‍ നിലനിര്‍ത്താനും സഹായിക്കും. എന്നാല്‍ ശരീരഭാരം കുറയുന്നത് മുട്ട കഴിക്കുന്ന രീതി മാത്രം ആശ്രയിച്ചല്ല. ഒരു ദിവസം ആകെ കഴിക്കുന്ന ഭക്ഷണത്തിന്റെ അളവ്, കലോറി, ശാരീരിക പ്രവര്‍ത്തനം, ഉറക്കം എന്നിവയും പ്രധാനമാണ്.
